کیسا میں ہم سفر تمہارا ہوں.... اتباف ابرک

کیسا میں ہم سفر تمہارا ہوں

ساتھ ہوں منتظر تمہارا ہوں

مجھ سے پوچھا مرا تعارف جو

کہہ دیا مختصر تمہارا ہوں

خود جو ٹوٹا تجھے بنانے میں

میں وہی کوزہ گر تمہارا ہوں

ہو سکے تم نہ میرے پل کے لئے

اور میں عمر بھر تمہارا ہوں

سایہ میرا تو میرے بس میں نہیں 

پر ہے وعدہ شجر تمہارا ہوں

ہم کو منظور ہر قیامت ہے

وہ جو کہہ دے اگر تمہارا ہوں

روک رکھا ہے ایک صحرا نے

ضد کرے میں ہی گھر تمہارا ہوں

تم تو دنیا کے ہوگئے ابرک

اور میں بے خبر تمہارا ہوں